الفيلم يتكلم عن ترافيس بيكل، سائق تاكسي يعاني من الوحدة والأرق، ويقضي أغلب وقته يتجول في شوارع نيويورك ليلًا. ومع الوقت يبدأ احتقانه من المجتمع يزيد، لين يدخل في دوامة تغير حياته بالكامل. بصراحة كنت أعرف إن الفيلم يعتبر كلاسيكي، لكن ما توقعت يخليني مندمج بهالشكل مع شخصية ترافيس. كل ما تقدم الفيلم كنت أحاول أفهمه أكثر، وكل مشهد كان يحسسني بعدم الراحة، وهذا أكثر شيء شدني فيه. روبرت دي نيرو قدم أداء أسطوري، من النوع الي يخليك تنسى إنك قاعد تشوف ممثل. نظراته، طريقته بالكلام، وحتى لحظات الصمت كانت تعبر عن الشخصية أكثر من أي حوار. وإخراج مارتن سكورسيزي كان رائع، وقدر ينقل إحساس الوحدة والعزلة بطريقة تخليك تعيشها مع ترافيس. أكثر شيء عجبني إن الفيلم ما يحاول يشرح لك كل شيء أو يوجهك كيف تفكر، بل يتركك تفسر الشخصية والأحداث بنفسك. وكل ما فكرت فيه بعد النهاية، حسيت إن فيه تفاصيل ورسائل أكثر مما لاحظت أثناء المشاهدة. من الأفلام الي أفهم ليش تعتبر من أعظم الكلاسيكيات، وتجربة تظل عالقة في بالك لفترة طويلة. ⸻ ⭐ التقييم: 9.8 / 10
1 إعجاب
